2023-11-12, კვირა

მიმართულება: - ზედაპირის ფართობი, მოცულობა

სამიზნე ცნება: სივრცული ფიგურები და მათი ზომები

მაკრო ცნება: მოდელირება, ფორმა, რაოდენობრივი მსჯელობა

კლასი: IX

დრო: 3 კვირა

კომპლექსური დავალების პირობა

დისტანციური სწავლების პერიოდში სკოლებმა შეწყვეტილი სასწავლო პროცესის გამო ელექტროენერგიის, ინტერნეტისა და გათბობის ხარჯები დაზოგეს. რადგანაც სკოლას შეუძლია დანაზოგები თავად მართოს, დირექციამ გადაწყვიტა დაზოგილი თანხით ერთ-ერთ კურორტზე არასტანდარტული კოტეჯი ააშენოს და იქ წარმატებული მოსწავლეებისთვის საზაფხულო ბანაკი მოაწყოს. დახმარება სპონსორებმაც აღუთქვეს.

სკოლის დირექციამ შენობის ფორმის, ოთახების განლაგების და გარე ვიზუალიზაციის შემუშავებაზე დახმარება თქვენ გთხოვათ.

თქვენი დავალებაა:

1. გამოიყენეთ თქვენს მიერ უკვე ნასწავლი გეომეტრიული ფიგურები, ასევე სწავლების პერიოდში შესწავლილი ახალი ფიგურები და შექმენით კოტეჯის მაკეტი. სკოლამ მოგცათ არჩევანის შესაძლებლობა. მიიღეთ არასტანდარტული გადაწყვეტილებები. მაკეტი შეგიძლიათ შექმნათ:
   
   1). ხელით მუყაოსაგან;
   2). ააგოთ minecraft-ში;
   3). გამოიყენოთ პროექტირებისთვის რომელიმე ელექტრონული პროგრამა (მაგალითად sweet home).
   
   
2. შენობის ზომები (სიგრძე და სიგანე), ასევე ოთახების რაოდენობა და განლაგება შეარჩიეთ თქვენ. გაითვალისწინეთ, რომ ერთდროულად შენობაში უნდა განთავსდეს 20 ადამიანი და ოთახის კარგი განათებისთვის ფანჯრების ფართობი იატაკის ფართობის 20% უნდა იყოს. შეარჩიე ფანჯრების შესაბამისი რაოდენობა და განლაგება, ისე რომ აკმაყოფილებდეს პირობას.
3. მაკეტის მიხედვით დაადგინეთ თითოეული ოთახის ზომები (სიგრძე, სიგანე), გამოთვალეთ ზედაპირის ფართობი, დაადგინეთ თითოეული ოთახის მოცულობა.
4. მოამზადეთ მშენებლობის ხარჯთაღრიცხვა. (მოიძიეთ ინფორმაცია ინტერნეტში, და ეცადეთ გათვალოს სამშენებლო ხარჯები):
   
   1). გაითვალისწინეთ ძირითადი საამშენებლო მასალა ხეა. დაადგინეთ სად დაგჭირდებათ კაფელის დაგება;
   2). მოიძიეთ ინტერნეტით 1 მ² ხის მასალის და თქვენთვის მისაღები კაფელის ფასი;
   3). გამოთვალეთ მთლიანად საჭირო ხის მასალის და კაფელის რაოდენობა და რა იქნება ღირებულება;
   4). დაადგინეთ რა მასალას შეარჩევთ გადახურვისთვის. მოიძიეთ მისი ღირებულება, ჩაატარეთ საჭირო გამოთვლები.
   
   

ჯგუფებმა წარმოადგინეთ პრეზენტაცია თქვენთვის სასურველი ფორმით. რჩევა:

დაგეგმარების პროცესში გამოიყენეთ როგორც მართი პრიზმები (სამკუთხა, ოთხკუთხა, მრავალკუთხა პრიზმები), ასევე პირამიდა და ცილინდრი; შეგიძლიათ წინ აუზის გაკეთებაც

ნაშრომის პრეზენტაციისას გაეცი პასუხი დავალების კითხვებს:

1. როგორ დაგეხმარა შერჩეული გეომეტრიული მოდელი მიმდინარე პროცესების აღქმასა და დასკვნების გამოტანაში;
2. როგორ დაგეხმარა გეომეტრიული ფიგურების ცოდნა მაკეტის აგებისას?
3. როგორ გამოთვალე შენს მიერ გამოყენებული გეომეტრიული ფიგურების ზომები; რა კრიტერიუმებით შეარჩიე საზომი ერთეულები?
4. როგორ გამოიყენე გეომეტრიული პრინციპების და გეომეტრიული ფიგურების თვისებების ცოდნა მოდელის აგებასა და სივრცული ფიგურის ზედაპირის ფართობის და მოცულობის გამოთვლაში?
5. მნიშვნელოვანია თუ არა გეომეტრიული ფიგურების ელემენტებს შორის კავშირის ცოდნა მოცემულ დავალებაში მსჯელობა დასაბუთებისთვის?

მოსწავლეს უნდა შეეძლოს:

1. რეალურ ცხოვრებაში, სამყაროში მიმდინარე მოვლენების აღწერა გეომეტრიული ობიექტების / ფიგურების მეშვეობით;
2. გეომეტრიული ფიგურების ცნობა და კლასიფიკაცია;
3. ახალი კავშირების დადგენა და წარმოდგენა;
4. გეომეტრიული ფიგურების ზომების გამოთვლა წესის შესაბამისად და გამოსახვა სტანდარტულ ერთეულებში
5. გეომეტრიული ფიგურის ელემენტებს შორის კავშირების დამყარება და ამ კავშირებზე ლოგიკური მსჯელობა;
6. გეომეტრიული პრინციპების ცოდნის გამოყენებით გეომეტრიული ფიგურებისა და მისი ელემენტების (ტოლობა, მსგავსება) დაკავშირება.

რეკომენდაციები მოსწავლეს:

თუ თქვენმა ჯგუფმა გადაწყვიტა, რომ სახლის მაკეტი გააკეთოს პროგრამა sweet home 3d-ის დახმარებით უყურეთ: ვიდეო

თუ თქვენმა ჯგუფმა გადაწყვიტა, რომ სახლის მაკეტი გააკეთოთ Minecraft-ის დახმარებით უყურეთ: ვიდეო

თუ თქვენმა ჯგუფმა გადაწყვიტა, რომ სახლის მაკეტი გააკეთოთ ხელით უყურეთ: ვიდეო

მითითებულ მისამართებზე ნახეთ მრავალწახნაგების შლილები: წესიერი პრიზმის შლილი და პირამიდა